Je vis, je meurs: je me brule et me noye.
J'ay chaud estremement en endurant froidure:
La vie m'est et trop molle et trop dure.
J'ay grands ennuis entremeslez de joye:
Tout à un coup je ris et je larmoye,
Et en plaisir, maint grief tourment j'endure:
Mon bien s'en va, et à jamais il dure:
Tout en un coup je seiche et je verdoye.
Ainsi Amour inconstamment me meine:
Et quand je pense avoir plus de douleur,
Sans y penser je me trouve hors de peine.
Puis quand je croy ma joue estre certaine,
Et estre au haut de mon desiré heur,
Il me remet en mon premier malheur.
No comments:
Post a Comment